പാലക്കാട് - സംസ്ഥാനത്തെ ആദ്യ പുകയില പരസ്യരഹിത ജില്ല

സംസ്ഥാനത്തെ ആദ്യ സമ്പൂര്‍ണ പുകയില പരസ്യരഹിത ജില്ലയായി പാലക്കാടിനെ പ്രഖ്യാപിച്ചുസിവില്‍ സ്റ്റേഷനില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്റ് ടി എന്‍ കണ്ടമുത്തന്‍ പ്രഖ്യാപനം നടത്തി. എം ബി രാജേഷ് എംപി പ്രതിജ്ഞാവാചകം ചൊല്ലിക്കൊടുത്തു. കലക്ടര്‍ കെ രാമചന്ദ്രന്‍ അധ്യക്ഷനായി. പുകയില ഉല്‍പ്പന്നങ്ങള്‍ ഏറ്റവും കുറച്ച് ഉപയോഗിക്കുന്നവര്‍ കേരളീയരാണെന്നത് അഭിമാനാര്‍ഹമാണെന്നും മദ്യത്തിന്റെ ഉപയോഗത്തിലും കുറവുണ്ടായിട്ടുണ്ടെന്നും ജില്ലാ പഞ്ചായത്ത് പ്രസിഡന്റ് പറഞ്ഞു. പുതിയ പ്രതിജ്ഞയെടുക്കാന്‍ പുതുവര്‍ഷദിനമാണ് ഏറെ അനുയോജ്യമെന്നും പ്രതിജ്ഞയെടുക്കേണ്ടത് പുകവലിക്കുന്നവരാണെന്നും എം ബി രാജേഷ് എംപി പറഞ്ഞു. പദ്ധതിപ്രവര്‍ത്തനങ്ങള്‍ക്ക് നേതൃത്വം നല്‍കുന്ന ഡെപ്യുട്ടി ഡിഎംഒ ഡോ. ആര്‍ പ്രഭുദാസ് ആമുഖ പ്രഭാഷണം നടത്തി. എഡിഎം കെ ഗണേശന്‍, അഡീ. ഡിഎംഒ ഡോ. പാര്‍വതി, ഡെപ്യുട്ടി ഡിഎംഒ കെ ശെല്‍വരാജ്, ജില്ലാ ടിബി ഓഫീസര്‍ ഡോ. രാധാകൃഷ്ണന്‍, ഡോ. പി കെ ജയശ്രീ, ഡോ. കെ എ നാസര്‍ എന്നിവര്‍ സംസാരിച്ചു.